चिखलीत फडणवीसांचा दमदार प्रचार – भाजपच्या विजयाचं बिगुल वाजलं!

चिखली (योगेश शर्मा) : नगरपरिषद निवडणुकीच्या प्रचाराची रणधुमाळी चिखलीत शिगेला पोहोचली आहे. मुख्यमंत्री देवेंद्र फडणवीस (Devendra Fadanvis), कामगारमंत्री आकाश फोंडकर (Akash Fundkar) व आमदार श्वेता महाले (Shweta Mahale) यांच्या उपस्थितीत भाजप उमेदवारांसाठी विजय सभा पार पडली. सभेत विकास, पिण्याच्या पाण्याची योजना, शहरातील गटारीसाठी नव्या प्रकल्पांची घोषणा देत फडणवीस यांनी चिखली शहराच्या सर्वांगीण विकासाचं आश्वासन दिलं.

नगरपरिषद निवडणूक २०२५ च्या पार्श्वभूमीवर भारतीय जनता पक्षाच्या नगराध्यक्ष पदाचे उमेदवार पंडितराव देशमुख आणि २८ नगरसेवक पदाच्या उमेदवारांच्या प्रचारार्थ आयोजित विजय सभेला महाराष्ट्राचे मुख्यमंत्री देवेंद्र फडणवीस, कामगार मंत्री आकाश फोंडकर, आमदार श्वेता महाले, जिल्हाध्यक्ष विजय शिंदे, शहराध्यक्ष सागर पुरोहित तसेच भाजपचे पदाधिकारी मोठ्या संख्येने उपस्थित होते. सभेला शहर व परिसरातील नागरिक, कार्यकर्ते, महिलांचा उत्स्फूर्त प्रतिसाद मिळून मैदान गर्दीने फुलून गेले होते.

महाले यांचा ‘देवाभाऊ’वरील भावनिक उल्लेख

सभेत आमदार श्वेता महाले यांनी मुख्यमंत्री देवेंद्र फडणवीस यांना ‘लाडक्या बहिणीचे देवा भाऊ, शेतकऱ्यांचे कैवारी, विकासाचे महामेरू’ म्हणत गौरव केला.

त्यांनी देवेंद्र फडणवीस प्रत्येक वेळी चिखलीत आले की कमळ फुलते, असा दावा करत २०१६-१७ च्या नगरपरिषद निवडणुका, २०१९ची विधानसभा, लोकसभा आणि विधानसभा उमेदवारी अर्जाच्या वेळी झालेल्या विजयी समीकरणांची आठवण करून दिली.

महाले म्हणाल्या की चिखलीला मिळालेला भरघोस निधी रस्ते, पायाभूत सुविधा आणि समाजभवनांच्या उभारणीसाठी प्रत्यक्षात वापरला जात असून विकास डोळ्यासमोर दिसतो आहे.

पिण्याच्या पाण्याची १२८ कोटींची योजना

आमदार महाले यांनी शहराच्या पिण्याच्या पाण्याच्या प्रश्नावर भाष्य करत, जवळपास ३० ते ४० वर्षांची प्रतिक्षा संपवणारी सुमारे १२८ कोटी रुपयांची नळपाणी योजना चिखलीला मिळाल्याची माहिती दिली.

ही योजना प्रगतीपथावर असून नागरिकांना कोणताही अतिरिक्त कर न लावता दररोज नळातून शुद्ध पाणी उपलब्ध होईल, असे त्यांनी स्पष्ट केले. या पार्श्वभूमीवर पंडितराव देशमुख यांना नगराध्यक्ष पदासाठी निवडून देण्याचे आवाहन त्यांनी नागरिकांना केले.

फडणवीसांचा विकासाचा ब्लूप्रिंट आणि शहरी धोरणे

मुख्यमंत्री देवेंद्र फडणवीस यांनी भाषणाच्या सुरुवातीला पंडितराव देशमुख यांना सर्वसामान्य जनतेत वावरणारा उमेदवार म्हणून संबोधले आणि कोणावरही व्यक्तिगत टीका न करता सकारात्मक मत मागण्यासाठी आपण आलो असल्याचे सांगितले.

त्यांनी केवळ सत्तेसाठी नव्हे तर शहराच्या सर्वांगीण विकासासाठी मतांची गरज असल्याचे सांगत चिखली विकासासाठी पूर्ण ब्लूप्रिंट तयार असल्याचा विश्वास व्यक्त केला. अमृत योजनेसह विविध शहरी योजनांद्वारे पिण्याचे पाणी, रस्ते, स्वच्छता आणि गटार व्यवस्थेसाठी केंद्र व राज्य सरकारने कोट्यवधींचा निधी उपलब्ध करून दिल्याचे त्यांनी नमूद केले.

गटार, पुनर्चक्रित पाणी आणि पारदर्शक कारभार

फडणवीस यांनी शहरातील नाले-गटार व्यवस्थेवर बोलताना आता फक्त नाले काढण्याच्या पारंपरिक पद्धतीऐवजी गटारीतील पाण्याचे प्रक्रिया करून पुनर्वापर करण्याची आधुनिक योजना राबवली जाणार असल्याचे सांगितले.

सर्वांगीण विकासासाठी दिलेला निधी योग्य हातात जावा यासाठी नगरपरिषदेवर योग्य लोकांची सत्ता असणे गरजेचे असल्याचे त्यांनी ठामपणे मांडले.

भाजप हा भ्रष्टाचार सहन न करणारा पक्ष असून गैरकारभार करणाऱ्या नगराध्यक्षाला पदावरून दूर करण्याचा निर्णयही पक्ष घेऊ शकतो, अशी आठवण करून देत पारदर्शक प्रशासनाचे आश्वासन त्यांनी दिले..

गरिबांसाठी पट्टे, आरोग्य व सामाजिक उपक्रम

शहरातील झोपडपट्टी भागातील गरिबांना मालकी हक्काचे पट्टे देण्यासाठी अतिक्रमणे नियमीत करून हक्काची कागदपत्रे देण्याचे सरकारचे प्रयत्न सुरू असल्याचे फडणवीस म्हणाले. झोपडपट्टी भागातील घरांसाठी सुमारे अडीच लाख रुपयांपर्यंतचा निधी, तसेच विविध योजनांद्वारे आर्थिक सहाय्य मिळेल, असेही त्यांनी स्पष्ट केले.

महात्मा फुले जनआरोग्य योजनेची मर्यादा पाच लाख रुपयांपर्यंत वाढवून उपचारासाठी समाविष्ट आजारांची संख्या जवळपास २४०० पर्यंत नेण्यात आल्याने सर्वसामान्य रुग्णांना मोफत उपचाराची मोठी हमी मिळाल्याचे त्यांनी सांगितले आणि ज्या आजारांवर पाच लाख रुपयांहून अधिक खर्च येतो त्यासाठीही अतिरिक्त सहाय्य देण्याचा सरकारचा निर्णय अधोरेखित केले.

संविधान दिन, प्रेरणास्थाने आणि पुतळे

संविधान दिनाच्या पार्श्वभूमीवर फडणवीस यांनी डॉ. बाबासाहेब आंबेडकरांच्या स्मृतीचा उल्लेख करत, चिखलीत बाबासाहेबांचा पुतळा नगर परिषदेच्या माध्यमातून उभारण्यात येईल, असे आश्वासन दिले.

त्यासोबतच महात्मा ज्योतिराव फुले आणि क्रांतिज्योती सावित्रीबाई फुले यांच्या पुतळ्यांचाही प्रस्ताव राज्य सरकारमार्फत मार्गी लावला जाईल, असे त्यांनी नमूद केले.

शहराच्या सामाजिक व सांस्कृतिक ओळखीला बल देण्यासाठी हे स्मारक प्रकल्प महत्त्वाचे असल्याचे त्यांनी सांगितले.

लाडकी बहिण योजना आणि शेतकरी कल्याण

महिलांसाठी राबविल्या जाणारी ‘लाडकी बहिण’ योजनेवर विरोधकांनी केलेल्या टीकेचा उल्लेख करत, ही योजना बंद होणार असल्याची अफवा खोटी ठरली असून वर्ष उलटूनही योजना सुरूच आहे, असे फडणवीस म्हणाले.

‘जोपर्यंत तुमचा देवा भाऊ आहे, तोपर्यंत ही योजना बंद होणार नाही,’ असा विश्वास त्यांनी महिलांना दिला. शेतकरी कल्याणासाठी सुरू असलेल्या योजनाही कायम असल्याचे त्यांनी जाहीर केले.

चिखलीच्या रणधुमाळीत भाजपचा जोशसभेच्या शेवटी फडणवीस यांनी पंडितराव देशमुख यांना नगराध्यक्ष आणि सर्व २८ नगरसेवकांना भरघोस मतांनी विजयी करून नगरपरिषदेवर भाजपची सत्ता आणण्याचे आवाहन केले.

भाजप हा विकास, पारदर्शकता आणि जनहित यासाठी कटिबद्ध पक्ष असल्याचे सांगत त्यांनी ‘पूर्ण महाराष्ट्राची ताकद चिखली नगरपरिषदेच्या पाठीशी उभी राहील,’ असा विश्वास व्यक्त केला.

सभेनंतर चिखली नगरपरिषद निवडणुकीच्या चौरंगी लढतीत भाजपने जोरदार माजी मारल्याचे चित्र राजकीय वर्तुळात रंगताना दिसत असून भाजप एकहाती सत्ता मिळवू शकतो, अशी चर्चा रंगत आहे.